Adrodd straeon, crefftau, cystadlaethau a mwy ar stondin Awdurdod y Parc yn Sioe Sir Benfro

Wedi’i lleoli ar gornel y Prif Rodfa a’r Rhodfa Ganolog, bydd gan stondin Awdurdod y Parc ddigon i ddiddanu a rhoi gwybodaeth i bobl o bob oed beth bynnag fo’r tywydd, o sesiynau adrodd straeon cyffrous a gweithdai celf a chrefft ysbrydoledig i wybodaeth ddefnyddiol am Arfordir Penfro.

Dywedodd Marie Parkin, Pennaeth Cyfathrebu a Marchnata’r Awdurdod:

“Mae Sioe Sir Benfro yn un o uchafbwyntiau’r calendr digwyddiadau lleol a gobeithiwn y bydd llawer o aelodau’r gymuned amaethyddol a’r cyhoedd ehangach yn heidio i weld y gorau o’r hyn sydd gan y sir i’w gynnig.

“Yn ogystal â’r adrodd straeon anhygoel a’r gweithgareddau celf ymarferol, bydd stondin yr Awdurdod yn cynnwys digon o gyfleoedd i gael gwybodaeth am y Parc Cenedlaethol a sut y gall pobl fwynhau’r hyn sydd ganddo i’w gynnig yn ddiogel ac yn gynaliadwy. Estynnir croeso cynnes i bawb.”

Bydd yr adroddwr straeon Phil Okwedy yn cynnal dwy sesiwn adrodd straeon arbennig ddydd Mercher 16 Awst, gan berfformio stori sy’n canolbwyntio ar iechyd afonydd, wedi’i lleoli yn Afon Cleddau a’i chyffiniau. Cynhelir y sesiynau am 11am a 2pm.

Ddydd Iau 17 Awst, bydd gweithdai creu canhwyllau am ddim drwy gydol y dydd dan arweiniad Bella Chandley o Just Bee.

Bydd yr artist lleol Hannah Rounding yn cynnal gweithgaredd celf am ddim ar y ddau ddiwrnod, gan helpu plant i greu hongiwr anifeiliaid wedi’i ysbrydoli gan ddarluniau Jackie Morris yn The Lost Words gan ddefnyddio papur lliw a phaent.

Bydd cyfle hefyd i ennill gwobrau gwych drwy gwblhau cystadleuaeth blodau gwyllt yn ogystal â chyfle i godi arian ar gyfer Ymddiriedolaeth Elusennol Arfordir Penfro gyda chystadleuaeth Enwi’r Pâl a thombola.

I gael gwybod mwy am Sioe Sir Benfro a phrynu tocynnau, ewch i www.pembsshow.org.

I gael rhagor o wybodaeth am Barc Cenedlaethol Arfordir Penfro, ewch i www.arfordirpenfro.cymru.