Mwynhewch Sulgwyn gwyllt ym Mharc Cenedlaethol Arfordir Penfro

Wrth i’r genedl baratoi am dymor prysur arall yr haf hwn, mae Awdurdod y Parc wedi trefnu rhaglen lawn dop o ddigwyddiadau, gyda rhywbeth at ddant pawb.

Yng Nghastell a Melin Heli Caeriw, bydd saethyddion a marchogion Bowlore yn dychwelyd rhwng dydd Sul 28 Mai a dydd Mawrth 30 Mai, gan gynnwys cleddyfa marwol, saethyddiaeth ac arddangosfeydd arfwisgoedd, yn ogystal â chyfle i gymryd rhan mewn Ysgol Gleddyfau, Rhoi Tro ar Saethyddiaeth a thrin arfau eraill go iawn. Dylai’r rheini sydd â diddordeb mewn arfau Canoloesol mwy o faint roi dydd Iau 1 Mehefin yn eu dyddiaduron, pan fydd Taniwch! Lansio’r Fagnel Anferthol yn cael ei gynnal am 2.30pm.

Yn newydd i Gaeriw eleni fydd gweithgaredd i blant a theuluoedd, yn seiliedig ar fyd bendigedig perlysiau. Ddydd Sadwrn 3 Mehefin am 11am, bydd Perlysiau Perffaith yn cynnwys taith fer synhwyraidd o welyau perlysiau’r Castell i gasglu’r cynhwysion sydd eu hangen i gynhyrchu amrywiaeth o gynnyrch naturiol.

Bydd ochr llai hudolus y Castell yn cael ei datgelu yn y sesiynau poblogaidd Hanesion Atgas sy’n dychwelyd i Gaeriw rhwng dydd Mercher 31 Mai a dydd Gwener 2 Mehefin am 11am. Am ddim yn y pris mynediad arferol, bydd y sgyrsiau hwyliog, rhyngweithiol hyn ar gyfer y genhedlaeth iau yn datgelu’r holl straeon gwaedlyd, yr hanesion atgas a’r adroddiadau ffiaidd sydd byth yn cael eu dysgu mewn gwersi hanes. Mae’n rhaid i rywun fod yno gyda’r plant.

Am ffi fechan, mae ymwelwyr iau yn cael eu gwahodd hefyd i gymryd rhan yn Llwybr Trysor y Brenhinoedd a Breninesau o amgylch tiroedd Castell Caeriw, a fydd yn cael ei gynnal drwy gydol gwyliau’r ysgol ac yn cynnwys gwobr frenhinol.

Mae antur hynafol ar y gweill i bawb sy’n ymweld â Phentref Oes Haearn Castell Henllys yn ystod hanner tymor, lle bydd aelodau cyfeillgar o’r llwyth yn rhannu eu straeon am fywyd yr Oes Haearn, yn ogystal ag arddangos crefftau a sgiliau hynafol. Am ffi ychwanegol, bydd amrywiaeth o weithgareddau cynhanesyddol ymarferol, gan gynnwys gwneud bara, yn cael eu cynnal rhwng dydd Llun a dydd Iau yn ystod hanner tymor.

Yn syth ar ôl eu concwest ar Ynys Môn, bydd milwyr Rhufeinig o’r Legio VIII Augusta MGV yn cyrraedd Castell Henllys ddydd Sadwrn 3 a dydd Sul 4 Mehefin i gwblhau eu concwest o Gymru. Mae arddangosfeydd arena anhygoel wedi’u trefnu am 12.30pm a 2.30pm, gyda chrefftau a gweithgareddau yn rhan o’r pris mynediad. Tocynnau yn £12 i oedolyn, £11 ar gyfer consesiynau, £10 i blant a £35 am docyn teulu (2+2).

Er y gellir darparu pob sesiwn yn ddwyieithog, mae’r Daith Tywys yng Nghastell Henllys ar ddydd Sadwrn 3 Mehefin wedi’i hanelu at ymwelwyr a hoffai eu profiad yn gyfan gwbl drwy gyfrwng y Gymraeg. Mae hefyd yn addas i’r rhai sy’n dysgu Cymraeg. Mae mynediad arferol yn berthnasol.

Bydd cyfle i brofi agweddau tawelach bywyd yr Oes Haearn, heb unrhyw weithgareddau swnllyd, ar ddydd Suliau rhwng 10am a 12 hanner dydd.

Yr hanner tymor hwn fydd y cyfle olaf i weld arddangosfa Amgueddfa Cymru Ar Eich Stepen Drws yn Oriel a Chanolfan Ymwelwyr Oriel y Parc yn Nhyddewi, gan ganolbwyntio ar ddarganfyddiadau archeolegol a naturiol lleol o bob maint, o’r ysbrydwlithen i ddarnau o arian aur.

Mae arddangosfeydd eraill sy’n cael eu cynnal yn Oriel y Parc yn ystod wythnos hanner tymor yn cynnwys Ysbrydoli gan Natur gan Grefftau Tŷ Hir, sy’n cynnwys sgarffiau sidan lliwgar, bagiau wedi’u ffeltio â llaw a darnau pren addurnol wedi’u troi, a Machlud a Thywod gan Kate Kelly, casgliad o waith olew, pastel ac acrylig, wedi’u hysbrydoli gan foroedd stormus, golau dramatig a chysgodion arfordir Penfro. Bydd y rheini sy’n ymweld ddydd Sadwrn 27 Mai yn cael cyfle i gwrdd â Kate Kelly ac i fynd am dro o gwmpas ei harddangosfa am 11am.

Bydd gwaith Edward Bowie yn cael ei arddangos yn y Tŵr yn ystod y cyfnod hwn, gan drosglwyddo symudiad, naws, lliw ac awyrgylch yr amgylchedd naturiol i ffurf weledol.

Ceir mynediad am ddim i’r holl arddangosfeydd, a bydd digonedd o weithgareddau crefft i gadw’r ymwelwyr iau yn brysur hefyd, gan gynnwys Llwybr Trysor Brenhinoedd a Breninesau am ffi fechan, a chyfle i wneud coron frenhinol o ddeunyddiau naturiol yng Ngweithdy Celf Clwb Dydd Mercher rhwng 11am a 3pm ar ddydd Mercher 31 Mai. Galwch heibio ar gyfer y gweithdy am gost o £3 y plentyn.

Ym Mlwyddyn y Llwybrau, mae rhaglen o Weithgareddau a Digwyddiadau Awdurdod y Parc yn cynnig digonedd o gyfleoedd i archwilio yn ystod wythnos hanner tymor ac i ddysgu mwy am dirlun anhygoel Sir Benfro.

Bydd taith gerdded gron ar safle Llwybr Pwll Cornel, a agorwyd yn ddiweddar, ar hyd yr Afon Nyfer, yn cael ei chynnal ddydd Mawrth 30 Mai, gan ganolbwyntio ar sut mae cadwraeth natur, materion mynediad a newid hinsawdd yn effeithio ar y rhan hon o’n Parc Cenedlaethol.

Efallai y bydd diddordeb gan y rheini sy’n dysgu Cymraeg, neu’n rhugl, i ymuno â thaith gerdded Gymraeg yng nghalon y Preseli ddydd Iau 1 Mehefin. Yn ogystal â’r golygfeydd godidog o Garn Meini, bydd llwybr Taith Gerdded Craig Talfynydd yn cynnwys meingylchoedd enigmatig a chylch cerrig Bedd Arthur a safle damwain awyren y Liberator wrth ymyl Carn Bica.

Bydd taith gerdded hamddenol o amgylch Tyddewi yn cael ei chynnal ddydd Gwener 2 Mehefin, gan edrych ar yr amrywiaeth o adeiladau, hynod a modern, sy’n rhan o ddinas leiaf Prydain. Wrth i’r tywyllwch ddisgyn, bydd cyfle hefyd i ymuno â Thaith Gerdded Ystlumod yng Nghaeriw, i ddarganfod mwy am greaduriaid swil y nos ac i wrando ar eu cleber ar ein synwyryddion eco-leoli.

Mae’n hanfodol archebu lle ar gyfer pob taith gerdded. Am amseroedd, prisiau tocynnau, archebion a’r rhaglen lawn o ddigwyddiadau’r haf, ewch i www.arfordirpenfro.cymru/digwyddiadau.