Mae cyfnodau preswyl yn Oriel y Parc yn caniatáu i artistiaid gymryd ysbrydoliaeth oddi wrth harddwch tirwedd y Parc Cenedlaethol a gweithio gyda grwpiau ac ysgolion lleol i greu darnau gwreiddiol o waith celf.
Mae’r cyfnod preswyl hefyd yn rhoi cyfle i artistiaid ryngweithio â darnau dethol o Amgueddfa Cymru.
Nid ydym yn derbyn unrhyw geisiadau Arlunydd Preswyl pellach ar hyn o bryd. Am wybodaeth bellach, e-bostiwch ni neu ffoniwch 01437 720392.
Cysylltiadau Hynafol - Cymunedau a'u Seintiau gan Grŵp Gwnïo Stitchy Witches
Dydd Mawrth 7 Ionawr i ddydd Sul 2 Mawrth 2025
Mae’r gosodiad tecstilau hwn, a gomisiynwyd gan y Prosiect Cysylltiadau Hynafol, yn dathlu’r cysylltiadau hanesyddol rhwng cymunedau penrhyn Tyddewi yn Sir Benfro a Ferns yn Swydd Wexford, Iwerddon. Bydd yn cynnwys cloestr canoloesol sydd wedi’i blannu â blodau gardd modern ar gyfer pryfed peillio a bywyd gwyllt, gan ddal y berthynas rhwng natur a hanes. Trwy ffenest y cloestr, cawn ein cludo yn ôl i’r 6ed ganrif i weld Dewi Sant ac Aeddan Sant a dangos sut mae’r ddwy gymuned wedi rhannu cwlwm dwfn ers dros 1500 o flynyddoedd. Mae’r gosodiad yn gyfuniad hyfryd o’r gorffennol a’r presennol mewn teyrnged i dreftadaeth a chysylltiad.
